17 – 20 октомври 2019

en mk
16 октомври МКЦ Кино Фросина, 22:00 МКЦ Кино Фросина, 22:00

NEXT TO SILENCE

влез слободен

АЛЕКСАНДАР НИКОЛОВСКИ труба

ФИЛИП ДИМИШКОВСКИ клавијатури

ДРАГАН СТОЈКОВСКИ бас

ГОЦЕ НАУМОВ тапани

Next to Silence е музички состав кој во својот репертоар вклучува исклучиво композиции од реномираната европска издавачка куќа ECM. Овоj состав е формиран пред десет години како резултат на истоимената емисија на скопското Jazz FM радио, чијшто водител беше еден од членовите на групата. Специфичниот карактер и автентичниот амбиент на ЕСМ композициите се основата од која Next to Silence го гради својот звук и понатаму го носи во правец којшто се разликува од оригиналната мелодија и структура. Реаранжирањето на ЕСМ композициите ѝ овозможува на групата да се движи во неизвесни музички насоки и да создаде поинаква звучна слика од изворната. Поради тоа, мотото од кое произлегува насловот на составот (...the most beautiful sound next to silence...) дозволува нивниот звук да кокетира со она што е најблиску до тишината, односно со галамата и хармонијата. Next to Silence умеат да бидат тивки и гласни, да ве однесат во спокојот на фантазмагоричните предели или да ве втурнат во прекрасниот хаос. Во своите настапи тие изведуваат неколку реаранжирани дела од богатиот опус на Енрико Рава, Карла Блеј, Џон Аберкромби, Дејв Холанд, Терје Рипдал, Шанкар, Јан Гарбарек, Џим Пепер, Гери Бартон, Art Ensemble of Chicago, Бил Фризел, Јон Балке, Томаж Станко, Нилс Петер Молваер и други. Неодамна почнаа да компонираат сопствена музика, којашто ќе биде, исто така, дел од репертоарот на овој концерт.